Францускиот енергетски гигант TotalEnergies ќе го зголеми откупот на сопствени акции во четвртиот квартал на 2,5 милијарди долари, од досегашните 1,5 милијарди долари, откако повисоките цени на нафтата, силните резултати од тргувањето и повисоките рафинериски маржи го зголемија профитот на компанијата, објави „Ројтерс“.
Компанијата најави дека во првиот квартал од 2027 година ќе откупи акции во вредност од 2 до 2,5 милијарди долари, додека дивидендата ќе расте за повеќе од 5% годишно до 2030 година.
Профитот на TotalEnergies годинава значително се зголеми под влијание на повисоките цени на нафтата, силните резултати од тргувањето и повисоките рафинериски маржи, во услови на нарушувања на глобалните енергетски пазари поради војната со Иран. Во вториот квартал компанијата го забележа највисокото ниво на заработка за речиси три години.
Покрај зголемувањето на исплатите кон акционерите, TotalEnergies најави и натамошен раст на производството. Компанијата очекува производството на нафта и гас да расте за 2% до 3% годишно во периодот од 2030 до 2035 година, потпирајќи се на проекти во Намибија, Нигерија, Либија, Малезија, Мозамбик и Папуа Нова Гвинеја.
Компанијата има докажани резерви за повеќе од 12 години производство, додека вкупното производство на енергија, нафта, гас и електрична енергија, треба да расте со околу 4% годишно до 2030 година.
TotalEnergies планира нето-инвестиции од 14 до 17 милијарди долари годишно во периодот од 2027 до 2032 година. Компанијата очекува и показателот на задолженост, односно односот меѓу нето-долгот и капиталот, да падне под 10% до крајот на 2026 година.
Компанијата истовремено потврди дека сака да одржува поврат кон акционерите од најмалку 40% од паричниот тек, додека постепено го намалува задолжувањето.
Најавите на TotalEnergies доаѓаат во период кога големите европски нафтени компании применуваат различни стратегии во однос на распределбата на капиталот. Британскиот BP претходно годинава го суспендираше откупот на акции со цел да се фокусира на намалување на долгот и инвестиции во раст, додека Shell во мај го намали кварталниот откуп од 3,5 на 3 милијарди долари.
Акциите на TotalEnergies во понеделникот пораснаа за околу 1%, во согласност со движењето на поширокиот европски енергетски индекс.
Извор: Ројтерс
