Брно/Прага. 6 мај 2025 – Планот на чешката влада да потпише договор со Јужна Кореја за изградба на два нови нуклеарни реактори е привремено стопиран откако регионалниот суд во Брно издаде судска забрана, јавуваат чешките медиуми. Одлуката доаѓа во пресрет на планираното потпишување на договорот кое беше закажано за среда.
Компанијата Korea Hydro & Nuclear Power Co. (KHNP), во партнерство со јужнокорејски конзорциум, беше избрана од чешката државна енергетска компанија Elektrarna Dukovany II (EDU II) за реализација на проектот вреден приближно 18,6 милијарди американски долари. Договорот предвидува изградба на два нови реактори во рамки на Нуклеарната централа Дуковани, на околу 200 километри јужно од Прага.
Но, француската компанија EDF, која беше еден од понудувачите, поднесе тужба против изборниот процес, тврдејќи дека истиот не бил транспарентен. Откако во октомври 2024 година нејзините приговори беа одбиени од страна на чешката Антимонополска комисија, EDF ја продолжи правната битка пред суд. 
Премиерот на Чешка, Петр Фијала, изрази увереност во транспарентноста на постапката: „Верувам дека судот е свесен за сите ризици и околности и дека ќе донесе брза одлука,“ изјави тој на социјалната мрежа X.
Доколку проектот се реализира, ова би била прва интернационална нуклеарна зделка за Јужна Кореја по договорот за изградба на нуклеарната централа Бараках во Обединетите Арапски Емирати во 2009 година.
Јужнокорејска владина делегација предводена од министерот за индустрија, Ан Дук-гун, пристигнува во Прага во текот на денот, со цел да се сретне со чешките власти и да се финализира договорот – доколку судската одлука дозволи.
Чешката влада активно се стреми кон намалување на фосилната зависност и зголемување на уделот на нуклеарната енергија, која моментално учествува со околу 40% во националниот енергетски микс. Целта е овој удел да надмине 50% во наредните години.
Според планот, првиот нов реактор треба да влезе во пробна фаза во 2036 година, додека вториот ќе следи околу две години подоцна. Новите реактори ќе го дополнат капацитетот на постоечките четири единици во Дуковани, кои датираат од 1980-тите години.
Извор: Koreatimes.co.kr
