Бостон. 01 мај 2025 – Автомобилскиот гигант Stellantis и американскиот стартап Factorial Energy соопштија дека успешно ја тестирале новоразвиената полуцврста батерија, која може да стане клучен чекор кон идната генерација на електрични возила. Батеријата е тестирана во реални услови и покажала дека ги задоволува автомобилските стандарди за квалитет.
Новиот тип батерија користи стабилен гел сличен на цврста материја наместо течен електролит како кај стандардните литиум-јонски батерии. Со енергетска густина од 375 Wh/kg, значително ја надминува моменталната технологија која се движи меѓу 200 и 300 Wh/kg, овозможувајќи поголема автономија на возилото без зголемување на тежината. Технологијата овозможува и брзо полнење бидејќи батеријата може да се наполни од 15% до 90% за околу 18 минути при собна температура. Исто така, поддржува висок капацитет на празнење (до 4C), што значи дека може да испорачува четирикратна моќност од својот капацитет на час.
Полуцврстата батерија функционира стабилно во температурен опсег од -30 °C до +45 °C, со помал губиток на автономија при ниски температури во споредба со постоечките батерии. Истата е успешно тестирана во два различни модели: Dodge Charger Daytona, фокусиран на перформанси, и Mercedes-Benz EQS, каде што се испитувала ефикасноста и досегот. 
Иако ваквите батерии во моментов се за 10 до 30 пати поскапи од литиум-јонските батерии, експертите веруваат дека со зголемена и оптимизирана продукција, трошоците може значително да се намалат во иднина. Дополнително, полесната конструкција на батеријата и потребата за помалку структурни компоненти може да ја намали вкупната тежина на возилата за 230 до 900 килограми. Секој заштеден килограм, според проценките, значи намалување на производствениот трошок за околу пет долари.
Извор: Stellantis
