Кина е исто толку опасна за енергетската безбедност на Европа како и Русија, предупреди заменик-генералната секретарка на НАТО, Радмила Шекеринска, на затворен состанок со министрите за енергетика на ЕУ, пренесува магазинот Политико.
Според европски официјални лица запознаени со разговорите, Шекеринска истакнала дека НАТО сè повеќе ги смета енергетските ранливости за воен ризик. Додека земјите членки на ЕУ се фокусирани на заштита на енергетската инфраструктура од физички и сајбер напади, Кина се гледа како посуптилна, но долгорочна закана поради силната зависност од нејзините технологии и материјали.
Таа укажала на доминантната улога на Кина во снабдувањето на Европа со материјали и технологии од кои во голема мера зависат европските воени и логистички синџири, особено во секторот на обновливи извори на енергија.
Предупредувањето доаѓа во време кога НАТО и ЕУ сè повеќе ја преиспитуваат зелената транзиција од безбедносен аспект. Европските институции веќе повикаа на ограничување на присуството на кинеските компании во секторите на ветерната и соларната енергија, вклучително и производството на соларни панели и инвертори.
Според Европската комисија, во 2024 година Кина обезбедила околу 98% од соларните панели увезени во ЕУ, 24% од биогоривата и сè поголем дел од ветерните турбини. Дополнително, зависноста постои и кај критичните суровини и батериите.
Во меѓувреме, европските власти за сајбер-безбедност работат на нова стратегија за намалување на ризиците во технолошките синџири на снабдување, при што соларната енергија е меѓу клучните приоритети.
Извор: Politico.eu
