Американското министерство за енергетика соопшти дека ќе обезбеди околу 1,9 милијарди долари за модернизација на клучната електроенергетска инфраструктура во земјата, со цел да се задоволи растечката побарувачка за електрична енергија и да се намалат трошоците за домаќинствата и компаниите.
Инвестицијата ќе се реализира преку програмата Speed to Power through Accelerated Reconductoring and other Key Advanced Transmission Technology Upgrades (SPARK), која предвидува брзи и долгорочни подобрувања на електричната мрежа. Фокусот е на замена на постојните далноводи со проводници со поголем капацитет, процес познат како „reconductoring“, како и примена на напредни технологии за пренос на електрична енергија.
Според Министерството, овие мерки треба да го зголемат капацитетот на електроенергетската мрежа, да ја подобрат оперативната ефикасност и да ја зајакнат сигурноста и стабилноста на системот, што на долг рок треба да доведе до пониски цени на струјата.
Американскиот секретар за енергетика Крис Рајт изјави дека модернизацијата на мрежата е клучна за намалување на трошоците за енергија и за обезбедување сигурно снабдување. „Со поддршка од претседателот Доналд Трамп, започнуваме важен процес на обновување на електричната мрежа за да се намалат сметките за струја на американските семејства и компании“, рече тој.
Помошник-секретарката за електрична енергија во Министерството, Кејти Јереза, истакна дека САД мора да го зголемат капацитетот на мрежата за да одговорат на растечката побарувачка и да обезбедат сигурно снабдување со електрична енергија.
Новата програма се надоврзува на иницијативата Grid Resilience and Innovation Partnerships (GRIP) Program, преку која во претходните години беа обезбедени до 10,5 милијарди долари за зајакнување на отпорноста и иновациите во електроенергетскиот систем.
Извор: Energy.gov
