Скопје. 23 март 2026 – Регулаторната комисија за енергетика, водни услуги и услуги за управување со комунален отпад (РКЕ) денес донесе одлука за утврдување на новите највисоки малопродажни цени на нафтените деривати, кои ќе стапат во сила од 24 март 2026 година, од 00:01 часот.
Со одлуката, цените на горивата бележат просечно зголемување од околу 1,39%, што главно се должи на растот на референтните цени на светските пазари, како и на прилагодувањата во структурата на цените поврзани со данокот на додадена вредност.
Новите максимални малопродажни цени се:
- ЕУРОСУПЕР БС-95 – 86,50 денари за литар
- ЕУРОСУПЕР БС-98 – 88,50 денари за литар
- ЕУРОДИЗЕЛ БС (Д-Е V) – 95,50 денари за литар
- Екстра лесно масло за домаќинство (ЕЛ-1) – 92,00 денари за литар
- Мазут М-1 НС – 47,610 денари за килограм
Со најновата одлука, цените на бензините ЕУРОСУПЕР БС-95 и БС-98 остануваат непроменети, односно се задржуваат на исто ниво како и во претходната одлука.
Од друга страна, дизелот бележи поскапување од 3,50 денари по литар, додека екстра лесното масло (ЕЛ-1) поскапува за 2,50 денари по литар. Цената на мазутот М-1 НС се зголемува за 0,157 денари по килограм.
Од РКЕ посочуваат дека растот на цените е резултат на силниот пораст на берзанските цени на нафтените деривати на светските пазари. Во анализираниот период, бензините поскапеле за над 13%, дизелот за повеќе од 16 проценти, а екстра лесното масло за околу 15%, што директно влијаело врз домашните цени.
Дополнителен фактор е и движењето на девизниот курс, при што денарот во однос на американскиот долар е повисок за околу 0,7%, што исто така е вклучено во пресметката.
РКЕ нагласува дека станува збор за највисоки малопродажни цени, што значи дека трговците со нафтени деривати имаат можност да ги формираат цените и пониско од утврденото ниво.
Извор: РКЕ
