Брисел.10 мај 2025 – Продажбата на електрични автомобили во Европската Унија забележа значителен пораст во првиот квартал од годинава, покажуваат најновите податоци на Европската асоцијација на производители на автомобили (ACEA). Во споредба со истиот период минатата година, електричните возила бележат раст од речиси 24%, а нивниот пазарен удел порасна од 12% на 15.2%.
Иако вкупната продажба на нови автомобили во ЕУ е намалена за 1.9% во однос на минатата година, расте интересот за електрични и хибридни возила, додека класичните бензински и дизел автомобили продолжуваат да го губат својот удел на пазарот. Во првиот квартал годинава, тие сочинуваат 38.3% од вкупната продажба, што претставува пад од една десетина споредено со истиот период лани.
Најголем интерес и понатаму постои за хибридни автомобили, кои сега имаат пазарен удел од 35.5%. Продажбата на plug-in хибриди исто така бележи раст, достигнувајќи удел од 7.6% од пазарот. 
Најголемиот раст на електричните автомобили е забележан во три од четирите најголеми пазари во ЕУ, кои сочинуваат 63% од сите регистрации на електрични возила. Така, продажбата во:
- Италија се зголеми за 72.5%,
- Германија за 38.9%,
- Белгија за 29.9%,
- Холандија за 7.9%.
Во Франција, пак, продажбата на електрични автомобили опадна за 6.6%, но таму се забележува драматичен скок на продажбата на хибриди – за 47.5% повеќе од лани.
Силен раст на хибридните возила е забележан и во други клучни пазари:
- Шпанија: +36.6%,
- Италија: +15.3%,
- Германија: +10.5%.
Во Словенија, продажбата на електрични возила е зголемена за 42.6% – од 904 на 1.289 возила, додека plug-in хибридите скокнаа за речиси 58%. Вкупната продажба на сите типови возила (вклучувајќи бензински и дизел) достигна 14.672 во првиот квартал, што е за 4.9% повеќе од лани.
Овие бројки укажуваат на постепено но стабилно поместување на европскиот автомобилски пазар кон поодржливи решенија, иако дел од очекувањата за е-возилата сè уште не се исполнети.
Извор: Acea.auto
