Наглиот раст на цените на бензинот, предизвикан од воениот конфликт во Иран, доведе до значително зголемување на продажбата на користени електрични возила низ Европа, покажуваат податоците од повеќе онлајн платформи за автомобили.
Според аналитичарите, високите цени на горивата веќе влијаат врз одлуките на потрошувачите, кои сè почесто се одлучуваат за алтернативи со пониски трошоци. „Во моментов има вистински бум на електрични возила на пазарот на половни автомобили“, изјави Терје Далгрен од норвешката платформа Finn.no, додавајќи дека електричните возила веќе ги надминале дизел моделите по продажба.
Воениот конфликт, кој започна на 28 февруари, сериозно го наруши глобалниот транспорт на нафта, при што околу 20% од светските испораки се погодени. Како директна последица, цените на бензинот во Европската унија пораснаа за 12%, достигнувајќи просек од 1,84 евра за литар во периодот од крајот на февруари до средината на март.
Францускиот онлајн продавач на половни возила Aramisauto забележа речиси двојно зголемување на уделот на продажба на електрични возила – од 6,5% на 12,7% за само три недели. Истовремено, продажбата на бензински и дизел возила бележи пад.
„Штом цената на бензинот надмине 2 евра по литар, тоа силно влијае врз свеста на потрошувачите“, изјави извршниот директор Ромен Боше, додавајќи дека интересот на купувачите се претвора во реални нарачки за електрични и хибридни автомобили.
Слични трендови се забележуваат и на други пазари. Компанијата OLX соопшти дека интересот за електрични возила пораснал за 50% во Франција, 40% во Романија, 54% во Португалија и 39% во Полска. Според извршниот директор Кристијан Гиси, геополитичката нестабилност само го забрзала процесот на транзиција кој веќе бил започнат.
Во Германија, најголемата платформа за автомобили mobile.de регистрирала тројно зголемување на пребарувањата за електрични возила, како и 66% повеќе барања од купувачи во споредба со февруари.
Експертите посочуваат дека пазарот на користени електрични возила реагира побрзо на вакви промени, бидејќи тие се значително поевтини од новите, до 40%, и веднаш достапни за купување, за разлика од новите модели кои често се чекаат со месеци.
Дополнително, проширувањето на понудата и воведувањето сертификати за состојбата на батериите ја зголемуваат довербата кај купувачите, што дополнително ја поттикнува побарувачката.
Аналитичарите очекуваат овој тренд да продолжи доколку цените на горивата останат високи, при што сè повеќе потрошувачи ќе се ориентираат кон електрични и хибридни возила како поекономична и одржлива алтернатива.
Извор: Ројтерс
