Варшава. 22 јули 2025 – Во историски момент за полскиот енергетски сектор, компанијата Central European Petroleum (CEP) објави дека е откриено едно од најзначајните наоѓалишта на нафта во Европа во изминатите десет години, лоцирано крај брегот на Балтичкото Море, во близина на градот Швиноујшче, на северозападот на Полска.
Наоѓалиштето, именувано како Wolin East 1 (WE1), содржи приближно 22 милиони тони нафта и кондензат, како и 5 милијарди кубни метри природен гас, според прелиминарните проценки. Широкиот концесиски регион, кој опфаќа површина од 593 квадратни километри, би можел да содржи повеќе од 33 милиони тони нафта и 27 милијарди кубни метри гас.
Со тоа, наодот има потенцијал да ги удвои моменталните нафтени резерви на Полска, кои во 2023 година изнесуваа околу 20,2 милиони тони, пренесува полската јавна телевизија TVP.
„Ова е историски момент за Central European Petroleum и за целиот полски енергетски сектор,“ изјави генералниот директор на компанијата, Ролф Г. Скар.
„Wolin East не е само ветувачко наоѓалиште – тоа е заедничка можност за отклучување на геолошкиот и енергетски потенцијал на Балтичкото Море,“ додаде тој.
Истражувањето е извршено со користење на платформа на кревање (jack-up platform), во плитки води длабоки 9,5 метри, при што е достигната вертикална длабочина од 2.715 метри.
Според полскиот заменик-министер за клима и животна средина, и главен национален геолог Кшиштоф Галош, ова откритие би можело да биде најголемото досега пронајдено наоѓалиште на нафта и придружен природен гас во историјата на Полска.
„Ако се потврди, Wolin East ќе стане клучна точка во истражувањето на јаглеводороди во Полска, особено во недоволно истражените области, како што е полската исклучива економска зона во Балтичкото Море,“ истакна Галош.
Проектот го раководи полската подружница на CEP, компанија со седиште во Канада и во мнозинска сопственост на норвешки инвеститори. CEP првично била основана за истражување на јаглеводороди во Европската Унија, со почетни активности во Германија.
Откритието има потенцијал значително да ја намали зависноста на Полска од увоз на фосилни горива и да придонесе за зајакнување на енергетската автономија на земјата.
Извор: EuroNews
