Атина. 24 март 2025 – Неодамна поставениот грчки министер за животна средина и енергија, Ставрос Папаставру, порача дека намалувањето на цените на енергијата е врвен приоритет за Европската Унија. Ова го истакна во изјава за медиумите пред почетокот на состанокот на Советот за енергија на ЕУ во Брисел, одржан во понеделникот на 17 март 2025 година, сигнализирајќи силна европска определба за решавање на енергетските предизвици.
„Нашата главна цел е да обезбедиме ниски цени на енергијата. Тоа е клучно за подобрување на животниот стандард на граѓаните на ЕУ, особено на најзагрозените, но и за зајакнување на конкурентноста на европската индустрија“, рече Папаставру, нагласувајќи ја итноста од заедничка акција. 
Министерот повика на создавање единствен енергетски пазар без пречки и нарушувања, кој би станал темел на новата енергетска стратегија на Европа. Тој посебно ја истакна важноста од инвестиции во меѓурегионалната поврзаност, како онаа меѓу Грција и Кипар, за што рече дека има „клучно геостратешко значење“ за Унијата.
„Време е за брзи и координирани потези. Целта ни е ЕУ-27 да прерасне во силна, конкурентна и отпорна енергетска унија. Ова е патот по кој чекориме“, потенцираше Папаставру.
Тој стапи на функцијата минатата недела, по реконструкцијата на грчката влада предизвикана од масовните протести поради управувањето со трагедијата во Темпе – железничка несреќа од пред две години во која загинаа 57 лица. Во својот прв настап на европска сцена, Папаставру ја поздрави новата иницијатива на Европската комисија – Акцискиот план за достапни цени – и нагласи дека Грција активно придонела со свои предлози во неговото обликување.
Извор: EnergyPress
