Загреб. 10 Мај 2025 – Според најновиот извештај на хрватската енергетска берза CROPEX за април 2025 година, вкупниот обем на тргување со електрична енергија изнесувал 982.941,6 MWh, што претставува пад од 10,3 отсто во однос на претходниот месец.
Од вкупниот обем, 732.302,5 MWh биле тргувани на пазарот за ден однапред, додека 250.639,1 MWh на внатрешнодневниот пазар. Годишната споредба покажува дополнително намалување, бидејќи тргувањето во април било за 3,2% помало во однос на истиот месец лани.
Ценовните трендови исто така бележат надолен притисок. Просечната дневна базна цена на пазарот за ден однапред изнесувала 84,78 евра за мегават-час, што е пад од 19,2% во однос на март. Значително пониска била и просечната „euro-peak“ цена, која се спуштила на 62,16 евра/MWh, бележејќи намалување од 35,4%. На внатрешнодневниот пазар, просечната цена изнесувала 82,88 евра/MWh, што е пад од 19,4% во однос на претходниот месец. 
Во април, на пазарот за ден однапред учествувале 33 компании, ист број како и во март, од кои 31 биле активни и на внатрешнодневниот пазар. Просечниот дневен обем на тргување на пазарот за ден однапред изнесувал 24.410,1 MWh.
Извор: Cropex.hr
