Москва. 31 август 2025 – По „Лукоил“ и „Гаспром“ кои објавија дека го завршиле првото полугодие од 2025 година со намалени профити, две од најголемите руски нафтени компании, „Роснефт“ и „Транснефт“, информираа дека во првата половина од годинава бележат значителен пад на добивката под влијание на високите каматни стапки, даночниот притисок и ограничувањата на глобалниот пазар на нафта.
„Роснефт“ соопшти дека нето-добивката во периодот јануари–јуни изнесувала 245 милијарди рубли (околу 2,7 милијарди долари) што е за 68,3% помалку отколку минатата година. Приходите се намалиле за 17,6%, на 4,26 трилиони рубли (околу 47,4 милијарди долари), а експлоатацијата на јаглеводороди опаднала за 7,4% на 121,6 милиони тони нафтен еквивалент. Производството на гас е скратено за 16%, додека преработката на сурова нафта се намалила за 5%, на 38,7 милиони тони. Според компанијата, резултатите се под влијание на високата клучна каматна стапка на Банката на Русија, ценовната конјунктура и логистичките ограничувања.
И покрај падот на добивката, капиталните вложувања се зголемени за 10,5%, достигнувајќи 769 милијарди рубли (околу 8,5 милијарди долари).
Истовремено, и „Транснефт“ објави пад на нето-добивката за 10%, на 153 милијарди рубли (околу 1,7 милијарди долари). Компанијата ја поврзува негативната динамика со зголемувањето на данокот на добивка, кој од 2025 година е покачен на 40% и ќе важи до крајот на деценијата. Приходите останаа стабилни на ниво од 720 милијарди рубли (околу 8 милијарди долари), додека EBITDA бележи раст од 3% на 308 милијарди рубли (околу 3,4 милијарди долари).
„Санкциите, ограничувањата на производството во рамки на ОПЕК+ и повисоката фискална оптовареност се главните фактори кои ја кочат динамиката на компанијата“, оценуваат експертите.
И покрај падот на добивката, „Транснефт“ продолжува со развојните проекти, меѓу кои проширување на магистралните нафтоводи кон Новоросиск и изградба на универзален претоварен комплекс во локалниот судоремонтен завод.
Извор: Itek.ru
