Скопје. 4 август 2025 – Компаниите ОКТА и Макпетрол, кои се меѓу клучните чинители во енергетскиот сектор на Македонија, бележат стабилни финансиски резултати за првата половина од тековната година, при што двете компании покажаа различни, но позитивни трендови во работењето.
Нафтената рафинерија ОКТА прикажа значително зголемување на добивката, која во периодот од јануари до јуни достигна 215,5 милиони денари (прибл. 3,5 милиони евра), што претставува повеќе од двојно зголемување во однос на истиот период минатата година, кога профитот изнесуваше 99 милиони денари (прибл. 1,6 милиони евра). Иако приходите од продажба се намалени за 21% и изнесуваат 17,8 милијарди денари (прибл. 289,4 милиони евра), овој пад е компензирани со сличен процентуален пад на трошоците за набавка – за 22%, односно 17,3 милијарди денари (прибл. 281,3 милиони евра). Акциите на компанијата последен пат беа тргувани на Македонската берза на 29 јули, по цена од 4.500 денари (прибл. 73 евра).
Во исто време, Макпетрол АД Скопје продолжува да го одржува лидерството на енергетскиот пазар, со приход од 14,48 милијарди денари (прибл. 235,5 милиони евра) – раст за близу 100 милиони денари (прибл. 1,6 милиони евра) споредено со лани. Нето-добивката по оданочување достигна 464,19 милиони денари (прибл. 7,5 милиони евра), што е зголемување од 5% во однос на претходната година. Добивката пред даноци изнесуваше 507,31 милиони денари (прибл. 8,25 милиони евра).
Компанијата бележи зголемување на продажбата и во малопродажниот и во големопродажниот сегмент – количинскиот промет во малопродажбата пораснал за 3,59%, а проширениот асортиман на бензинските станици придонел за раст на приходите во овој сектор од 9,09%. Големопродажбата забележа поизразен раст од 24,56%, особено поради повисокиот промет со природен гас и млазно гориво.
Трошоците на Макпетрол се зголемени минимално – за 0,55%, достигнувајќи 13,98 милијарди денари (прибл. 227,4 милиони евра), при што најголеми влијанија имаа зголемувањето на платите и транспортните трошоци.
И покрај предизвиците на пазарот, и ОКТА и Макпетрол покажаа финансиска стабилност и континуирана поддршка на развојните планови, потврдувајќи ја својата значајна улога во енергетскиот сектор на државата.
Енергетика 24
