Скопје. 1 ноември 2025 – ОКТА ги објави финансиските резултати за првите девет месеци од 2025 година, при што компанијата оствари ЕБИТДА од 513 милиони денари и добивка пред оданочување од 490 милиони денари. И покрај засилената конкуренција на извозните пазари, резултатите се потпираат на намалениот негативен ефект од вреднувањето на залихите, зголемената продажба на електрична енергија и пониските оперативни трошоци.
Приходите од продажба во периодот јануари–септември 2025 година изнесуваат 28,1 милијарда денари, што е помалку од 34,4 милијарди денари остварени во истиот период лани. Сепак, бруто добивката порасна за 20%, достигнувајќи 971 милион денари.
Во третиот квартал од годината, цените на суровата нафта се намалија поради нарушената рамнотежа меѓу понудата и побарувачката и зголеменото производство од ОПЕК+ и други производители. Инфлациските притисоци и геополитичките тензии продолжија да создаваат нестабилност на пазарот.
Продажбата во третиот квартал изнесуваше 317 илјади м³, што претставува намалување од 4% на годишно ниво, додека извозот учествуваше со 32% во вкупната продажба. Бруто добивката во истиот квартал порасна за 68%, на 418 милиони денари, а прилагодената ЕБИТДА изнесуваше 260 милиони денари, што е раст од 6%.
Нето добивката за третиот квартал достигна 232 милиони денари, во споредба со 32 милиони денари лани, што претставува значителен пораст.
Следејќи ја својата стратегија за намалување на емисиите на јаглерод диоксид, ОКТА инвестираше 32 милиони денари во проекти за обновлива енергија. Компанијата истовремено продолжи со општествено одговорните иницијативи во областите на превенција на пожари, безбедност во сообраќајот и културата, како и со Програмата за стипендии за млади професионалци.
Извор: ОКТА
