Белград. 22 август 2025 – Нафтната индустрија на Србија (НИС) соопшти дека до Министерството за финансии на САД поднела ново барање за издавање посебна лиценца, со која би се одложила целосната примена на санкциите и би се овозможило компанијата да продолжи со работа и по 27 август, кога истекува сегашната дозвола.
Од НИС изразија благодарност до домашните и странските институции кои го поддржуваат процесот. Компанијата потсети дека од почетокот на годината пет пати било одложено спроведувањето на санкциите врз основа на специјалните лиценци на Канцеларијата за контрола на странски средства (OFAC) при американското Министерство за финансии.
Инаку, нa НИС веќе подолг период и се закануваат санкции поради мнозинскиот руски удел во сопственичката структура. Во март компанијата официјално побара од Вашингтон да биде избришана од т.н. SDN листа (Specially Designated Nationals), што, како што беше наведено, претставува сложена и долготрајна процедура.
Извор: Nova.rs
