Белград. 29 јули 2025 – Министерството за финансии на САД издаде нова специјална лиценца со која се одложува целосното стапување во сила на санкциите кон Нафтната индустрија на Србија (НИС) до 27 август, соопшти компанијата. Новата лиценца ѝ овозможува на НИС и на нејзините оперативни зависни друштва да продолжат со нормално деловно работење, склучување и извршување договори, управување со долгови и капитал, како и учество во дипломатски и конзуларни активности надвор од Русија.
Бајатовиќ: Се боревме за секој ден работа
Директорот на „Србијагас“, Душан Бајатовиќ, изјави дека одложувањето на санкциите не било автоматско, туку резултат на дипломатски и лобистички напори. Тој подвлече дека овие санкции се политички по природа, како последица од заострените односи меѓу САД и Русија, а Србија е, како што рече, колатерална штета.
„НИС може да опстои. Работи во отежнати услови, но може да дише. Има околу 60% удел во малопродажбата во Србија, иако падот во големопродажбата е значителен поради неизвесноста кај корпоративните клиенти“, изјави Бајатовиќ за РТС.
Според него, и покрај кредитниот товар од 550 милиони евра, компанијата засега не се соочува со доспеани обврски, благодарение на поддршката од Владата и Народната банка на Србија. Тоа ѝ овозможува на НИС да продолжи со деловна стабилност.
Извор: Танјуг
