Скопје. 20 јануари 2026 – Во декември 2025 година, согласно податоците на Националниот оператор на пазар на електрична енергија – МЕМО, за задоволување на вкупната нето-потрошувачка на електрична енергија во државата продадени се 614 GWh, што претставува значително зголемување во однос на ноември, кога нето-потрошувачката изнесуваше 504 GWh.
На пазарот на електрична енергија во декември се реализирани трансакции од сопствено производство во висина од 605 GWh. Најголемо учество повторно има ЕСМ со 305 GWh или 50,4%, по што следуваат независните производители со 199 GWh, односно 33%. Виртуелните производители учествуваат со 50 GWh или 8,2%, додека повластените производители кои користат повластена тарифа реализирале производство од 51 GWh, што претставува 8,4% од вкупното домашно производство.
Во споредба со ноември, домашното производство е зголемено за 72 GWh, што е во согласност со растот на потрошувачката во зимскиот период. Учеството на домашното производство во однос на нето-потрошувачката во декември изнесува 98,5%, што укажува на високо ниво на енергетска самодоволност и минимална зависност од увоз.
На годишно ниво, вкупното домашно производство целосно ја покрива вкупната нето-потрошувачка на електрична енергија во државата, со учество од 100%.
Извор: MEMO
