Скопје. 5 декември 2025 – Македонската берза на електрична енергија продолжува да го зголемува бројот на активни трговци и да го зајакнува својот пазарен капацитет. На ден-однапред пазарот официјално се приклучи GSA Energy, компанија што стана 40-ти регистриран учесник.
GSA Energy, основана во 1993 година, важи за значаен регионален трговец со електрична енергија и доверлив партнер во Југоисточна Европа. Компанијата развива напредни модели за интеграција на производство од обновливи извори, технологија за складирање и ефикасно тргување, со цел да обезбеди стабилни и одржливи енергетски решенија.
Од МЕМО истакнуваат дека годинава е забележан раст на тргувањето од 40% во однос на лани, што го оценуваат како показател за зголемена доверба на пазарните учесници, стабилност на системот и континуирана работа на операторот за поголема ликвидност и транспарентност.
„Нашиот пазар станува сѐ поатрактивен и подинамичен. Продолжуваме да инвестираме во развој и подобрување на услугите“, велат од МЕМО, додавајќи дека заедничкиот напредок на сите учесници е двигател на енергетскиот сектор во земјата.
Извор: МЕМО
