Лондон, 16 октомври 2025 – Фосилните горива како нафтата, гасот и јагленот ќе продолжат да имаат доминантна улога во глобалното производство и потрошувачка на енергија и по 2050 година, покажува новиот извештај на консултантската компанија „McKinsey & Co“.
Според анализата, растечката побарувачка за електрична енергија, особено од индустрискиот и градежниот сектор, ќе го надмине темпото на транзицијата кон обновливи извори. Најголем придонес кон овој раст ќе имаат дата-центрите во Северна Америка, чија побарувачка за електрична енергија се очекува да се зголемува за околу 25% годишно до 2030 година.
„McKinsey & Co“ прогнозира дека до средината на векот фосилните горива ќе сочинуваат меѓу 41% и 55% од глобалната енергетска потрошувачка – помалку од денешните 64%, но повеќе од претходните проекции. Употребата на природен гас за производство на електрична енергија значително ќе се зголеми, додека јагленот ќе остане присутен подолго од очекуваното.
Партнерот во „McKinsey & Co“, Диего Ернандес Дијаз, во изјава за Ројтерс вели дека компанијата сега не очекува побарувачката за нафта да достигне свој врв пред 2030-тите години. „Ова е веројатно најголемата промена во нашето гледиште за еволуцијата на енергетскиот систем“, нагласи тој.
Иако обновливите извори имаат потенцијал да обезбедат 61% до 67% од глобалниот електричен микс до 2050 година, „McKinsey & Co“ предупредува дека алтернативните горива веројатно нема да добијат широка примена пред 2040 година, освен ако не бидат законски задолжителни.
Извештајот посочува дека геополитичките неизвесности и приоритетот што владите го даваат на енергетската сигурност и достапност, пред климатските цели од Парискиот договор, се клучни фактори за продолжената зависност од фосилни горива. Дополнителни ризици, како енергетски рецесии, трговски тарифи и технолошки промени, исто така влијаат на глобалната енергетска рамнотежа.
Извор: Mckinsey.com
