Дубаи. 10 април 2025 – Компанијата за обновлива енергија од Обединетите Арапски Емирати, Масдар, денес објави дека целосно ја презела грчката компанија Терна Енерџи (TENr.AT), по купувањето на мнозинскиот удел минатата година, што претставува дополнителен чекор во нејзината стратегија за меѓународна експанзија.
Масдар, кој сака да ги искористи можностите во секторот погоден од високите каматни стапки и растечките трошоци за долг, во последните месеци ја зајакнува својата позиција на европските пазари. Компанијата во ноември минатата година купи 70% од Терна за 20 евра по акција, во зделка вредна 3,2 милијарди евра (3,52 милијарди долари), со што грчката компанија доби проценета вредност од 2,4 милијарди евра (2,63 милијарди долари).
Преостанатите акции беа откупени по иста цена преку задолжителна понуда и исфрлање на останатите акционери, соопшти Масдар. Извршниот директор на Масдар, Мохамед Џамил Ал Рамахи, истакна дека аквизицијата на Терна ја нагласува посветеноста на компанијата кон енергетската трансформација во Грција и Европа. 
Инаку, Масдар исто така, планира проширување во Азија и Соединетите Држави и има за цел да го зголеми својот капацитет на обновлива енергија на 100 гигавати до 2030 година, од сегашните околу 51 гигават, кои се во различни фази на развој.
Со седиште во Абу Даби, главниот град на ОАЕ, Масдар е под контрола на компанијата за електрична енергија и вода TAQA, државниот нафтен гигант ADNOC и суверениот инвестициски фонд Mubadala Investment Company.
Извор: Ројтерс
