Љубљана. 23 октомври 2025 – Францускиот претседател Емануел Макрон и словенечкиот премиер Роберт Голоб пред два дена во Љубљана ја потврдија решеноста за продлабочување на европската економска и енергетска соработка, нагласувајќи ја потребата од поголема конкурентност и стратешка автономија на Европската унија.
Двете држави потпишаа декларација за долгорочна соработка во областа на нуклеарната енергија, која може да има значително влијание врз изборот на технологија за изградба на вториот блок на нуклеарната централа „Кршко“.
Премиерот Голоб истакна дека Европа треба да се потпира на сопствени економски и технолошки капацитети, додека Макрон ја оцени соработката како клучна за „одржлива и иновативна Европа“.
Како симбол на економското партнерство, двајцата лидери ја посочија фабриката „Ревоз“ во Ново Место, која ќе биде единствената во Европа што ќе го произведува редизајнираниот електричен модел Twingо, проект што треба да ја засили конкурентноста на европската автомобилска индустрија во однос на азиските производители.
Покрај енергетската соработка, Макрон и Голоб потпишаа и договор за образовна размена, со што се проширува мрежата на билатерални проекти меѓу двете земји.
Макрон нагласи дека Европа мора да остане „континент на иновации“ кој брзо реагира на пазарните промени и глобалните предизвици, вклучително и климатските и геополитичките.
Посетата на францускиот претседател започна во Пристаништето Копер, каде беше потпишана декларација за зајакнување на соработката со француската поморска компанија CMA CGM, со цел зголемување на протокот на стоки и возила кон Централна Европа, уште еден чекор во стратегиското поврзување на Франција и Словенија во областа на логистиката, енергетиката и индустријата.
Извор: Lider.si
