Скопје, 5 април 2026 – Премиерот Христијан Мицкоски денеска соопшти пакет нови вонредни мерки за ублажување на ценовниот притисок врз граѓаните, со кои се намалуваат акцизите на горивата и се продолжува намалената стапка на ДДВ.
Во обраќањето до јавноста, Мицкоски истакна дека глобалните тензии на Блискиот Исток предизвикуваат раст на цените на нафтата и сериозни потреси на светските пазари, што директно се одразува и врз домашната економија. Тој нагласи дека Владата реагира проактивно со цел да го заштити животниот стандард.
Според донесените одлуки, намалената стапка на ДДВ за горивата од 10% ќе остане во сила до завршување на кризата, додека акцизите се намалуваат за 4 денари по литар кај дизелот и за 2 денари кај бензините од 95 и 98 октани.
Премиерот посочи дека без овие мерки цената на дизелот би надминала 102 денари за литар, а бензините би поскапеле за дополнителни 1,5 до 2 денари. Со новите интервенции, како што рече, се амортизира потенцијалниот ценовен шок.
Дополнително, по разговори со компанијата „ОКТА“, обезбедено е продолжување на попустите до крајот на април, што значи намалување од 3 денари по литар за дизел и 2 денари за бензините. Со тоа, вкупниот ефект е стабилизирање на цената на дизелот и дури благо намалување кај бензините.
Мицкоски информираше и дека потрошувачката на гориво достигнала рекордни 2 милиони литри дневно, при што е забележан зголемен интерес од странски граѓани. Сепак, увери дека нема ризик од недостиг и дека снабдувањето е стабилно.
„Нема да дозволиме товарот од глобалната криза да падне врз плеќите на граѓаните“, порача премиерот, додавајќи дека Владата останува подготвена за нови мерки доколку состојбата се влоши.
Тој заклучи дека приоритет остануваат економската стабилност, сигурноста во снабдувањето и заштитата на стандардот на граѓаните.
Извор: Vlada.mk
