Иако соларните панели можат да издржат и до три децении, соларните инвертори – уредите што ја претвораат произведената еднонасочна струја (DC) во наизменична (AC) – имаат пократок животен век и се сметаат за „послаба алка“ во системот. Според енергетските експерти, најчеста причина за нивно откажување е абењето на електролитските кондензатори, кои стареат побрзо од останатите компоненти.
На пазарот најчесто се користат два типа: стринг-инвертори и микроинвертори. Стринг-инверторите се поекономично решение за покриви со добра ориентација и без сенки, полесни се за сервисирање бидејќи имаат централизирана инсталација и едноставно ожичување, а цената им е пониска.
Микроинверторите, пак, иако поскапи, се посигурни и траат речиси колку и самите панели, односно до 25 години, поради што се препорачуваат за покриви со сенки или недоволно поволна ориентација. Постојат и DC оптимизатори кои најчесто се комбинираат со стринг-инвертори, а нивната издржливост исто така достигнува до 25 години.
Животниот век на стринг-инверторите се движи од 10 до 15 години, што значи дека обично мора да се заменат барем еднаш во текот на работниот век на панелите. Стандардните гаранции се меѓу пет и десет години, но производителите нудат и продолжени гаранции до 20 години. Микроинверторите, пак, речиси секогаш имаат гаранција од 20 до 25 години, но како понова технологија сè уште е неизвесно дали во практика ќе го исполнат тоа ветување.
Истражувања покажуваат дека 80% од дефектите кај соларните системи се јавуваат токму кај инверторите. Причините може да бидат различни – од проблеми во електричната мрежа и неправилна инсталација, до прегревање на компонентите на покривот. За да се продолжи нивната издржливост, експертите препорачуваат инверторите да се поставуваат на ладни и суви места со добра циркулација на воздух, а не на директно сонце. Се советува редовна визуелна проверка на уредот на секои три месеци за оштетувања, нечистотии или прашина, како и професионален преглед на секои пет години, што чини од 200 до 300 долари, освен ако не е покриен со сервисен договор.
На американскиот пазар, водечки производител на микроинвертори е Enphase, додека SolarEdge е лидер кај DC оптимизаторите. Tesla, пак, се обидува да навлезе со свои решенија во сегментот на стринг-инвертори, но останува да се види дали ќе успее да освои значителен удел.
Извор: Pv-magazine.com
