Крајниот снабдувач со електрична енергија во Косово, компанијата КЕСКО, поднесе барање до Регулаторната комисија за енергетика за зголемување на цените на струјата, повикувајќи се на растечките трошоци и очекуваното намалување на домашното производство во 2026 година.
Од компанијата предупредуваат дека доколку повисоките трошоци не бидат вградени во тарифите, може да се загрози стабилноста и одржливоста на снабдувањето. Во таа насока, КЕСКО бара зголемување на дозволениот годишен приход на 528,8 милиони евра, од сегашните 448,1 милион евра.
Како главна причина се наведува продолжениот ремонт на двете косовски термоелектрани, кој, според проценките, ќе трае подолго во 2026 година отколку во изминатата година. Локалните медиуми објавија дека ваквата корекција на дозволените приходи би можела да доведе до поскапување на електричната енергија за крајните корисници за околу 21,4%.
Во моментов, дневната тарифа за домаќинствата со месечна потрошувачка до 800 киловат-часови изнесува 9,05 евроценти по kWh, додека ноќната тарифа е 3,88 евроценти.
КЕСКО неодамна информираше дека ниското домашно производство, како резултат на ремонтите и исклучително високата побарувачка, предизвикало повремени прекини во снабдувањето со електрична енергија. Состојбата, според компанијата, се стабилизирала откако една од производствените единици повторно била приклучена на електроенергетската мрежа.
Инаку, двете застарени термоелектрани во Косово се опфатени со обемен проект за модернизација вреден околу 193,5 милиони евра, чија цел е зголемување на производниот капацитет и сигурноста на системот. Со термоелектраните Косова А и Косова Б управува државната енергетска корпорација КЕК.
Ова не е прв пат трошоците да се прелеат врз потрошувачите. Во април минатата година, енергетскиот регулатор веќе одобри зголемување на цената на струјата од 16%, врз основа на повисоки влезни и оперативни трошоци.
Извор: Seenews.com
