Доха. 16 октомври 2025 – Катарскиот министер за енергетика и извршен директор на QatarEnergy, Саад ал-Кааби, предупреди дека новите правила на Европската унија за корпоративна одржливост би можеле да го загрозат снабдувањето на Европа со течен природен гас (ЛНГ).
Во изјава за „Ројтерс“, Ал–Кааби изјави дека Директивата за корпоративна одржливост и должна грижа (CSDDD), усвоена во 2024 година, претставува сериозен ризик за државната компанија QatarEnergy. Според него, регулативата, која бара големите компании во ЕУ да идентификуваат и спречат злоупотреби на човековите права и еколошки штети во своите синџири на снабдување, може да доведе до казни и до 5% од глобалните приходи за фирми што немаат планови за климатска транзиција во согласност со Парискиот договор.
„Речиси една година се обидуваме да воспоставиме конструктивен дијалог со Европската комисија и земјите-членки околу последиците од оваа директива, но досега не добивме никаков одговор,“ изјави Ал-Кааби.
Иако Европскиот парламент оваа недела разгледа измени за ублажување на законот, Катар смета дека предложените промени не ги адресираат неговите главни грижи.
Катар, еден од водечките светски извозници на ЛНГ, обезбедува меѓу 12% и 14% од европските потреби за течен гас по руската инвазија на Украина во 2022 година. Земјата има долгорочни договори за снабдување со Shell, TotalEnergies и ENI.
Ал-Кааби предупреди дека доколку регулативата не се ревидира, QatarEnergy ќе биде приморана да го преиспита своето присуство на европскиот пазар, вклучително и снабдувањето со ЛНГ.
„Таквите прекумерни правила го зголемуваат ризикот за компаниите и, на крајот, ќе ги погодат европските потрошувачи преку поскапа и понестабилна енергија,“ рече катарскиот министер.
Европската комисија сè уште нема коментар на предупредувањата од Доха.
