Загреб/Сараево. 15 декември 2025 – Со доаѓањето на новата американска администрација предводена од претседателот Доналд Трамп започнува реализацијата на проектот за поврзување на гасните мрежи на Босна и Херцеговина и Хрватска, кој се одложуваше повеќе од една година. Ова го изјави енергетскиот експерт Ивица Јакиќ во емисијата „Студио 4“ на ХРТ.
Според Јакиќ, Јужната гасна интерконекција е природен енергетски процес што го поврзува ЛНГ терминалот во Омишљ со БиХ. Гасоводната мрежа веќе стигнала до Дугопоље и логично е да продолжи кон централна Босна, каде што гасот би се користел за домаќинствата и индустријата. Проектот, како што рече, овозможува снабдување со големи количини гас, со можност за алтернативен правец и кон Србија.
Јакиќ потсети дека со години немало договор меѓу бошњачката и хрватската страна во БиХ. Како компромис, формирана е нова компанија во која „БХ Гас“, „Електропривреда ХЗ Херцег-Босна“ и „Плинакро“ од Загреб имаат по 33 отсто сопственост, додека американска компанија ќе управува со проектот, ќе ја изгради интерконекцијата и ќе ги наплатува своите маржи.
Тој предупреди дека преминот кон гас ќе бара значајни инвестиции во приклучоци и инфраструктура, како и изградба на две хибридни гасни електрани – во Мостар и Какањ. Според него, тоа е неопходно поради зголемените трошоци за CO₂ сертификати за јагленските капацитети и би овозможило годишна потрошувачка од околу 1,5 милијарди кубни метри гас.
Јакиќ оцени дека проектот ќе го намали руското влијание во енергетиката и ќе биде катализатор за економска соработка меѓу бошњачката и хрватската страна во БиХ.
„Ова е голема можност за хрватските компании. Со заедничка иницијатива може јасно да се дефинира иднината на енергетиката и индустријата во БиХ“, заклучи Јакиќ.
Извор: Vijesti.hrt.hr
