Литлтон. 15 август 2025 – Извозот на течен природен гас (LNG) од САД во првите осум месеци од годинава порасна за 22% во однос на истиот период во 2024 година, достигнувајќи рекордни 69 милиони тони, покажуваат податоците на компанијата Kpler. Со тоа, САД ја зацврстија позицијата како најголем снабдувач на LNG во светот.
Европа е главниот пазар, со над две третини од вкупниот извоз, пред Азија. Најголеми купувачи се Холандија, Франција и Шпанија, кои заедно учествуваат со 28% од вкупните пратки. Побарувачката во Европа е зголемена поради намаленото производство од ветерни и хидроцентрали, како и политички и трговски фактори по враќањето на Доналд Трамп на претседателската функција во САД.
Во периодот јануари–август 2025 година, европските увози на американски LNG пораснале за 61% во однос на истиот период лани. Зголемените цени на гасот на глобално ниво доведоа до рационализација на потрошувачката во Азија, каде купувањата на американски LNG паднале за 35%.
Американскиот удел во глобалниот извоз на LNG пораснал на рекордни 24,5% во 2025 година, од 21% во 2024.
Просечната извозна цена на американски LNG во првите пет месеци од годинава изнесувала 8,34 долари за илјада кубни стапки – 38% повеќе од лани и највисока од 2023 година.
Цените за домашните потрошувачи исто така пораснале: за електроенергетскиот сектор за 52%, за индустријата за 32%, за домаќинствата за 6%, а за комерцијалните корисници за 8%.
Иако вкупната потрошувачка на гас во САД е на рекордно ниво, електроенергетскиот сектор забележа намалување од 4% поради поголемо производство од јаглен и обновливи извори. Индустриската употреба пораснала за 1,5%, комерцијалната за 11%, а домашната за 11,4%.
Побарувачката за LNG извоз расте многу побрзо од другите сегменти – за 140% меѓу 2019 и 2024 година. Во 2025 година се очекува извозниот сектор да ја надмине потрошувачката на гас во домаќинствата, станувајќи трет најголем потрошувач во САД, по електроенергетиката и индустријата. Ова може да го задржи притисокот врз цените и да ја обликува динамиката на домашниот пазар.
Извор: Ројтерс
