Загреб. 22 октомври 2025 – Терминалот за течен природен гас (ЛНГ) во Омишал, Хрватска, го удвои својот капацитет по вградувањето на нов модул за регасификација. Со тоа, можноста за преработка и дотур на гас е зголемена од 3,9 на 6,1 милијарда кубни метри годишно.
„Протокот на гас од терминалот е зголемен од 450.000 на 700.000 кубни метри на час,“ изјави за ХРТ директорот на ЛНГ Хрватска, Иван Фугаш.
Зголемениот капацитет, според хрватските власти, обезбедува целосна енергетска независност на земјата и отвора можности за извоз на гас во соседните држави.
„Овој капацитет е повеќекратно поголем од домашните потреби. Го направивме тоа од солидарност со Словенија и Унгарија, но и за да придонесеме кон енергетската безбедност на регионот, па дури и до Баварија,“ изјави министерот за економија, Анте Шушњар.
Европската унија сè повеќе се потпира на ЛНГ како замена за рускиот гас. Министрите за енергетика на земјите членки потврдија дека од 1 јануари 2028 година ќе стапи во сила целосна забрана за увоз на руски гас.
„Новите ЛНГ капацитети овозможија европските држави да ја намалат зависноста од рускиот гас. Цените се стабилизираа, од 350 евра по мегават-час паднаа на околу 35 евра,“ изјави претседателот на Хрватската стручна асоцијација за гас, Далибор Пудиќ.
Терминалот во Омишал ќе започне со комерцијална работа на 26 октомври, кога дополнителните капацитети ќе бидат достапни за пазарот.
Извор: Hrt.hr
