Сушата и економската неисплатливост на фосилните горива го намалија домашното производство – обновливите извори првпат со најголем удел
Загреб. 18 јули 2025 – Хрватска бележи загрижувачки раст на енергетската зависност – увозот на електрична енергија во јуни 2025 година достигна 32% од вкупната потрошувачка, покажува анализа на здружението Обновливи извори на енергија Хрватска (OIEH).
Во вториот квартал од годината, увозот во просек учествувал со 17,3% во расположливата електрична енергија, што укажува на сè поголема ранливост на хрватскиот енергетски систем. Во април тој изнесувал 4,9%, во мај се зголемил на 19,6%, а во јуни достигнал врв од 32%.
Причините за оваа состојба се повеќеслојни: сушните услови и слабото топење на снеговите резултираа со 23% помала хидропроизводство од вообичаениот просек, додека производството од термоелектрани опаднало за над 50% – главно поради непланираното исклучување на Термоелектраната Пломин и високите цени на производство на струја од гас.
Сепак, позитивен тренд се забележува кај останатите обновливи извори на енергија – сонце, ветер, биомаса и биоплин – кои за првпат стануваат водечки сегмент во структурата на расположлива енергија, со рекорден удел од 29,7%.
„Овие бројки се јасен сигнал дека мораме итно да ја засилиме домашната енергетска продукција преку забрзување на проекти за обновливи извори, зајакнување на мрежната инфраструктура и инвестирање во капацитети за складирање електрична енергија“, се наведува во анализата на OIEH.
Во таа насока, здружението во соработка со Европската банка за обнова и развој (ЕБОР), Институтот „Хрвоје Пожар“ и Факултетот за електротехника и компјутерски науки работи на изработка на студија за идентификација на критични точки во мрежата и потребите од батериски системи за складирање.
Целта, според експертите, е изградба на модерен, стабилен и енергетски самостоен систем што ќе биде основа на идната зелена транзиција.
Извор: OIE.hr
