Атина. 12 септември 2025 – Грчкиот премиер Киријакос Мицотакис во четвртокот во Атина оствари средба со американскиот секретар за внатрешни работи Даг Бургум, во чиј главен фокус беа енергетската соработка и заедничките проекти во регионот.
Средбата се одржа еден ден по поднесувањето понуда од американскиот нафтен гигант Chevron за истражување на јаглеводороди во четири офшор блока јужно од Крит и Пелопонез – потег кој Атина го гледа како потврда на нејзините суверени права во источниот Медитеран.
„Интересно е што вашата посета се совпадна со официјалното изразување интерес на Chevron за истражувачки активности јужно од Крит, што ги потврдува правата на Хеленската Република во тој регион,“ рече Мицотакис во воведното обраќање пред новинарите.
Според соопштението од грчката влада, разговорите потврдиле дека односите меѓу Грција и САД се на „одлично ниво“, со јасен приоритет кон енергетската агенда. Мицотакис и Бургум разговарале за големи регионални проекти, вклучително и електроенергетските интерконектори GSI и GREGY, коридорот Александруполис–Одеса, како и за улогата на грчкото бродарство во транспортот на течен природен гас (LNG).
Посебно внимание било посветено на трансформацијата на Грција во енергетски центар за Источен Медитеран и Југоисточна Европа – улога што, според Атина, ја прави клучен играч во европската енергетска безбедност.
Бургум истакна дека целта на САД е да обезбедат доволно енергетски ресурси за своите сојузници, за да ја намалат зависноста од Русија и други „непријателски држави“.
„Администрацијата на претседателот Трамп има јасна цел – енергетска изобилност за пријателите и сојузниците, за да не мораат да купуваат од нашите противници. Соединетите Американски Држави се целосно посветени на замената на рускиот гас со американски,“ изјави американскиот секретар.
Тој потсетил дека европските земји во 2021 година увезуваа 45% од својот гас од Русија, додека годинава тој удел е намален на околу 13%. Забраната за увоз на руска сурова нафта преку море го намали увозот на ЕУ за 90%, иако некои земји, како Унгарија и Словачка, сè уште добиваат нафта преку цевководи.
Во рамките на посетата, Бургум ја разгледа LNG-терминалата на островчето Ревитуса крај Атина, која редовно прима пратки од американските извозници. Податоците покажуваат дека увозот на американски LNG во Грција пораснал за 95% во првата половина од годинава.
Истовремено, понудата на Chevron за истражување во грчките води предизвикува геополитички импликации, бидејќи некои од блоковите се наоѓаат во близина на области што се предмет на спорови со Турција и Либија. За Атина, американскиот интерес претставува индиректна поддршка за нејзините поморски граници.
Извор: Primeminister.gr
