Кохтла-Јарве. 5 септември 2025 – Естонската компанија Freen OÜ претстави нова генерација батериски системи што користат натриум-јонска технологија, нудејќи европска алтернатива на доминацијата на азиските производители на литиумски батерии.
Двата нови модели – Freen-BSH (висок напон) и Freen-BSL (низок напон) – целосно се развиени и произведени во Естонија. Според извршниот директор Андреј Хименков, нивното лансирање е чекор кон побезбеден и поекономичен пристап до енергија.
„Воведувањето на натриум-јонските батерии претставува значајна иновација во нашиот производствен портфолио, по успешниот развој на малите ветерни турбини,“ изјави Хименков.
Натриум-јонската технологија нуди неколку клучни предности во однос на литиумските системи. Најважна е топлинската стабилност, која речиси целосно го елиминира ризикот од пожар или експлозија. Дополнително, батериите не содржат кобалт, што ги прави поеколошки и ја намалува зависноста од чувствителни геополитички пазари.
За разлика од литиумските, овие батерии не се предмет на меѓународни транспортни ограничувања, што ја олеснува нивната дистрибуција и инсталација.
Системите се дизајнирани за статичко складирање на енергија, со примена во домаќинства, телекомуникациска инфраструктура, комерцијални објекти, електрични полначи, како и јавни установи – училишта и болници.
Со оваа иновација, Естонија се позиционира како значаен играч во европската енергетска индустрија, нудејќи поодржлива и побезбедна алтернатива на традиционалните литиумски батерии.
Технички спецификации на Freen батериските системи
| Карактеристика | Freen-BSH (висок напон) | Freen-BSL (низок напон) |
|---|---|---|
| Тип батерија | Натриум-јонска (Na-ion) | Натриум-јонска (Na-ion) |
| Номинална енергија | 10,08 kWh по модул | 7,5 kWh по модул |
| Капацитет | 17,5 Ah | 158 Ah |
| Напон | 575 V (опсег: 385–760 V) | 48 V (опсег: 40–60 V) |
| Макс. струја празнење | 8,75 A | 100 A |
| Животен век | > 5.000 циклуси при 80% DoD | > 5.000 циклуси при 80% DoD |
| Скалабилност | до 10 модули паралелно (100,8 kWh) | до 6 модули паралелно (45 kWh) |
| Димензии | 952 × 108 × 745 mm | 952 × 108 × 745 mm |
| Тежина | 123 kg | 123 kg |
| Работна температура | –10 °C до +35 °C | –10 °C до +35 °C |
| Температура празнење | –40 °C до +60 °C | –40 °C до +60 °C |
| Заштита | IP65 | IP65 |
| Комуникација | CAN | CAN |
| Инсталација | Подготвен за вградување, со интегрирани тркалца | Подготвен за вградување, со интегрирани тркалца |
Извор: Pv-magazine.com
