Брисел, 14 јули 2025 – Амбасадорите на Европската Унија се блиску до постигнување договор за 18-тиот пакет санкции против Русија, кој вклучува и нов, понизок ценовен капак за руската нафта, јавуваат четири извори од ЕУ по состанокот одржан во неделата, јавува агенцијата Ројтерс.
Според Ројтерс, сите елементи од пакетот се договорени, иако една земја-членка сè уште има техничка резервација во однос на новиот капак, велат изворите кои зборувале под услов на анонимност поради чувствителноста на разговорите. Се очекува целосен договор да биде постигнат во понеделник, пред состанокот на министрите за надворешни работи во Брисел, каде што формално би можел да биде усвоен пакетот.
Покрај намалениот ценовен плафон, договорен е и нов механизам за динамично одредување на цената. Европската комисија во петокот предложи „динамичен“ плафон — цената на руската нафта да биде 15% пониска од просечната пазарна цена на сурова нафта во последните три месеци.
Според еден од изворите, почетната цена ќе изнесува околу 47 долари за барел, врз основа на просечната цена на руската сурова нафта во последните 22 недели, намалена за 15%. Наместо на секои три месеци, цената ќе се ревидира на секои шест месеци.
Словачка, која досега го блокираше пакетот, бара дополнителни уверувања од Европската комисија во врска со плановите за постепено укинување на руската гасна испорака, но сепак го поддржува новиот пакет мерки.
Санкциите мора да бидат усвоени со едногласна согласност од сите земји-членки на ЕУ.
Групата на седумте најразвиени економии (Г7) го воведе првичниот ценовен плафон во декември 2022 година, со цел да ја ограничи способноста на Русија да ја финансира војната во Украина. ЕУ и Велика Британија веќе два месеца вршат притисок врз Г7 да го намали сегашниот лимит од 60 долари за барел, бидејќи падот на фјучерсите на нафта го направи тој капак неефективен.
Плафонот забранува трговија со руска сурова нафта транспортирана со танкери ако цената надминува 60 долари по барел и ограничува активности на компании за транспорт, осигурување и реосигурување на вакви пратки, освен ако цената не е под лимитот.
Новите санкции вклучуваат и забрана за трансакции со гасоводите „Северен тек“, како и финансиски мрежи кои ѝ помагаат на Русија да ги заобиколи санкциите.
Дополнително, во пакетот ќе бидат вклучени и една руска рафинерија во Индија, две кинески банки и регистар за знамиња под кои Русија ги оперира своите танкери „од сенка“.
Извор: Ројтерс
