Брисел, 16 јуни 2025 – Европската комисија и полското претседателство на Советот на ЕУ денес официјално ја лансираа новата Работна група за Енергетска унија, во рамките на состанокот на Советот за транспорт, телекомуникации и енергетика. Оваа стратешка иницијатива има за цел да поттикне посилна соработка и координација меѓу земјите членки на ЕУ во клучните енергетски прашања.
Работната група, најавена во Акцискиот план за достапна енергија објавен годинава, ќе се фокусира на приоритети како што се подобро искористување на енергетската инфраструктура, забрзување на интерконективноста, унапредување на координацијата во планирањето на мрежите и енергетските системи, како и поддршка во следењето на националните активности за спроведување на планот.
„Само преку поблиска соработка можеме да изградиме вистинска Енергетска унија. Оваа работна група ќе биде двигател на нашата заедничка мисија – да обезбедиме сигурен, чист и достапен енергетски систем кој ќе ги задоволи потребите на граѓаните и стопанството,“ изјави Дан Јоргенсен, европски комесар за енергија и домување. 
Во Работната група ќе учествуваат високи претставници од Европската комисија и земјите членки, со дополнителна техничка поддршка од институции како Европската инвестициска банка (EIB), Агенцијата за соработка на енергетски регулатори (ACER), како и други експерти по потреба. Средбите ќе се одржуваат редовно, при што ќе се разработуваат конкретни стратешки предлози.
Следната седница на Работната група е закажана за почетокот на септември и ќе биде прва можност да се дискутираат конкретни политики и мерки.
Иако неформална и без законски мандат, Работната група ќе има важна координациска улога и ќе поднесува редовни извештаи до претседателот на Европската комисија, Европскиот совет, Советот за енергетика и Европскиот парламент.
Извор: Европска Комисија
