Брисел. 23 октомври 2025 – Енергетската политика ќе продолжи да биде во центарот на вниманието на Европската унија и во 2026 година, покажува Програмата за работа на Европската комисија за наредната година, насловена „Моментот на европската независност“.
Главниот фокус на документот е продлабочување на интеграцијата на Единствениот пазар со цел зајакнување на конкурентноста, економскиот раст и отпорноста. Енергетскиот сектор останува клучен дел од овие напори, продолжувајќи ги иницијативите започнати годинава – Чистот индустриски договор и Планот за достапна енергија.
Во првиот квартал од 2026 година се очекува усвојување на Стратегијата за електрификација, која ќе опфати и специјална иницијатива за греење и ладење, како и Пакетот за енергетска безбедност. За сите овие мерки веќе се одржани или се во тек јавни консултации.
Во втората половина на годината вниманието ќе се насочи кон новите цели и планови за Енергетската унија по 2030 година. Програмата најавува предлог-закони за управување со Енергетската унија, Директивата за обновлива енергија, Директивата за енергетска ефикасност и инфраструктурата за транспорт и пазар на CO₂.
Посебно место има и стратегијата за воспоставување први фузиски електрани во Европа, за која сè уште не е утврден точен датум на усвојување.
Во рамките на напорите за поедноставување на европското законодавство, во вториот квартал од 2026 година е планиран и Енергетскиот омнибус, кој ќе се фокусира на поедноставување на прописите за енергетски производи.
Овие иницијативи ќе се надоврзат на Пакетот за електрични мрежи, Пакетот за енергија за граѓаните и Стратегијата за инвестиции во чиста енергија, чија објава се очекува до крајот на 2025 година.
Покрај тоа, Комисијата најавува и мерки за справување со кризата на достапност и трошоците за живеење, меѓу кои и нова иницијатива за регулирање на краткорочните изнајмувања на станови.
Извор: Европска комисија
