Брисел. 11 декември 2025 – Подлабоката интеграција на гасните пазари меѓу Европската Унија и земјите од Енергетската заедница станува клучна за енергетската безбедност на континентот, порача директорот на Секретаријатот на Енергетската заедница, Артур Лорковски, на годишната конференција на ENTSOG во Брисел.
Говорејќи на панел за безбедно снабдување во интегриран и достапен енергетски систем, Лорковски оцени дека постепеното напуштање на рускиот гас го менува европскиот енергетски пејзаж и бара системски, а не изолирани национални решенија.
„Нашето искуство е јасно: интеграцијата нè префрла од краткорочни реакции кон трајна енергетска безбедност“, изјави тој.
Имплементацискиот извештај за 2025 година на Енергетската заедница покажува напредок во реформата на гасниот сектор, но и упорни слабости, меѓу кои и недостигот од потребни капацитетски производи на интерконекциите Украина–Молдавија и Србија–Босна и Херцеговина. Овие слабости го ограничуваат искористувањето на постојната инфраструктура и бараат итна интервенција.
Обврската од Четвртиот гасен пакет на ЕУ, мрежните правила да важат на сите граници од август 2026 година, ја засилува потребата од усогласено прекугранично делување. Само доследна примена од страна на земјите членки и договорните страни ќе го отвори целосниот потенцијал на регионалната инфраструктура.
Особен фокус добива Транбалканскиот гасовод, означен како клучна диверзификациска рута. Со интегрирани пазари и усогласени правила, овој коридор може поефикасно да ги поврзе новите извори на гас со регионалните складишта, кои постепено се трансформираат од национални во регионални безбедносни ресурси.
Енергетската заедница најавува продолжена техничка поддршка, мониторинг и регионални платформи за координација, со цел интеграцијата да прерасне во практична гаранција за сигурно и предвидливо снабдување – особено во време на пазарни тензии и кризни состојби.
Извор: Energy-community.org
