Луксембург. 21 ноември 2025 – Европската инвестициска банка (ЕИБ) и Европскиот инвестициски фонд (ЕИФ) одобрија финансиски пакет од 17,7 милијарди евра со цел забрзување на зелената транзиција, зајакнување на економската конкурентност на Европа и продлабочување на глобалните партнерства.
Средствата се наменети за проекти во индустријата за полупроводници, батериско складирање и клучна инфраструктура, како и за иницијативи од социјален интерес, меѓу кои изградба на социјални станови во Белгија, адаптација кон климатските промени во Италија и Германија, модернизација на железнички линии во Шпанија и Унгарија, вложувања во обновлива енергија на француски компании и унапредување на енергетските мрежи во Грција, Словачка и Италија.
Во рамките на ноемвриските седници, 4,2 милијарди евра се одобрени преку програмата TechEU, најголемата европска иницијатива за поддршка на иновации. „Овој пакет на TechEU ја зајакнува европската иноваторска база, нашата конкурентност и безбедност,“ изјави претседателката на ЕИБ Групацијата, Надја Калвињо.
ЕИФ дополнително одобри повеќе инструменти за поддршка на инвестицискиот екосистем во Централна, Источна и Југоисточна Европа, вклучувајќи фонд за социјално влијание, фонд за раст, секјуритизациска трансакција во Балтикот и приватен кредитен фонд насочен кон регионот.
Надвор од Европската Унија, ЕИБ Групацијата поддржа проекти за чиста енергија во Египет и Тунис, изградба на училишта во Бенин и подобрување на железничката инфраструктура во Црна Гора, дел од стратегијата Global Gateway за зајакнување на европското глобално присуство и партнерства.
ЕИБ, во сопственост на земјите-членки на ЕУ, финансира проекти во осум стратешки области, меѓу кои климатски акции, дигитализација, одбрана и социјална инфраструктура. Во 2024 година, ЕИБ Групацијата потпиша речиси 89 милијарди евра за над 900 високоимпактни проекти, при што околу половина од инвестициите во ЕУ се насочени кон кохезиски региони, а близу 60% кон климатска и еколошка одржливост.
Извор: Eib.org
