Подгорица. 21 јули 2025 – Во 2024 година Црна Гора бележи значителен пораст на потрошувачката на електрична енергија, при што домашното производство не успеа да ги задоволи потребите, па земјата беше принудена на голем увоз на струја. Според податоците на Монстат, увезени се дури 5 952,8 гигават-часови (GWh) електрична енергија, додека производството од домашни извори изнесуваше 2 106,4 GWh примарна енергија, а од трансформации дополнителни 1 430,1 GWh.
Главен извор на електрична енергија и понатаму останува хидроенергијата, со 1 770,5 GWh произведени од хидроелектрани. Сè поголема улога добива и енергијата од ветер, со 293,3 GWh, додека соларната енергија, иако сè уште скромна со 42,6 GWh, покажува јасен тренд на раст. Ова укажува дека обновливите извори доминираат во структурата на производството, но не се доволни за да се покрие целосната домашна побарувачка.
Во исто време, извозот на струја од Црна Гора изнесуваше 6 108,7 GWh, што е повеќе од увозот, но не значи дека внатрешните потреби се задоволени. Од вкупната количина, 471,1 GWh се изгубиле при пренос и дистрибуција, додека 104,7 GWh биле потрошени во самиот енергетски сектор. За финална потрошувачка останале 2 804,9 GWh.
Најголеми потрошувачи биле домаќинствата, со учество од 55,3% во вкупната потрошувачка, додека комерцијалниот сектор и јавните услуги трошеле 38,5%. Индустријата учествувала со 5,4%, а останатите дејности со само 0,9%.
Иако Црна Гора извезува дел од струјата што ја произведува, внатрешната потрошувачка сè повеќе зависи од увозот, што отвора прашања за енергетската безбедност и потребата од натамошно инвестирање во домашни, особено обновливи, извори на енергија.
Извор: Monstat.org
