Софија. 11 ноември 2025 – Количините гориво во Бугарија се доволни за да го снабдуваат населението и бизнисот во подолг временски период дури и во случај на прекин на работата на „Лукоил“. Ова го изјави бугарскиот министер за енергетика Жечо Станков, пренесува агенцијата БТА.
Според него, рафинираните горива што се складирани во странство би можеле да задоволат потрошувачка од четири до пет дена, а нивниот транспорт до земјата не би ја променил значително ситуацијата.
„Како министер имам две главни задачи“, изјави Станков. „Првата е постојана комуникација со Канцеларијата за контрола на странски средства (OFAC), за да добиеме позитивен исход што ќе ѝ овозможи на рафинеријата во Бургас да продолжи со работа и по 21 ноември.“
Втората задача, рече тој, е поврзана со обезбедување на сигурност на снабдувањето со гориво за граѓаните по достапни цени.
На прашање дали владата има „план Б“ во случај да не се постигне договор со американските власти, Станков изјави дека е уверен дека „планот А ќе функционира доволно добро“.
Резерви за 35 дена бензин и 50 дена дизел
Инаку, претседателот на Државната агенција за резерви и военовременски залихи, Асен Асенов, соопшти дека Бугарија има резерви од бензин за околу 35 дена и од дизел за повеќе од 50 дена.
Тој додаде дека земјата моментално располага со околу 98% од законски пропишаните 90-дневни резерви, при што половина од тие количини се складирани на територијата на Бугарија, а останатите, во Италија, Холандија, Унгарија, Словачка, Грција и Романија.
Во последните недели бугарскиот парламент двапати усвои итни законски измени поврзани со санкциите на САД против „Лукоил“. Прво беше забранет извозот на нафтени деривати, пред сè дизел, кон земји членки на ЕУ, а потоа беа воведени нови правила за назначување на специјален државен управител на рафинеријата и другите објекти на компанијата во земјата.
Со овие мерки, бугарската влада настојува да го заштити енергетскиот систем и националната безбедност, во услови на неизвесност околу иднината на рускиот енергетски гигант.
Извор: Actualno.com
