Во вториот квартал од 2025 година цената на суровата нафта Брент забележа пад од 10,8 отсто, под влијание на новите американски царини и зголеменото производство на земјите од групата ОПЕК+. Барел Брент кој во март изнесуваше 74,55 долари, во јуни се тргуваше за 66,46 долари, а во април падна и до 58,22 долари, што претставува најниско ниво од јануари 2021 година.
Пазарот беше притиснат од одлуката на американскиот претседател Доналд Трамп од 2 април да воведе најмалку 10% дополнителни царини за увоз од клучните трговски партнери, што ја зголеми загриженоста за трговска војна и го намали интересот за нафта. Истовремено, ОПЕК+ ја забрза експанзијата на производството, зголемувајќи ја дневната понуда за 960.000 барели, што дополнително ја поткопа цената.
Во мај и јуни беше забележано делумно закрепнување, односно, раст од 2,6% во мај и 6,2% во јуни – поттикнато од одложувањето на дел од американските царини и подобрените прогнози за побарувачката, но тоа не беше доволно да се надомести кварталниот пад.
Експертите предупредуваат на нови ризици. Според Палаш Џаин од лондонската консултантска компанија FGE, во краток рок Брент може да се спушти околу 60 долари за барел поради слабите глобални показатели и растот на резервите, но геополитичките фактори би можеле нагло да ја сменат насоката. Како клучна непозната тој ја посочува позицијата на Индија во однос на рускиот увоз на нафта, доколку под притисок на Вашингтон официјален Њу Делхи им нареди на домашните рафинерии да престанат со обработка на руска суровина, цената би можела да скокне до 80–85 долари.
Од друга страна, аналитичарот Аџај Пармар од ICIS оценува дека комбинираниот ефект од царините и дополнителното снабдување од ОПЕК+ ќе остане доминантен фактор и во наредните месеци. Тој прогнозира дека со натамошно зголемување на производството, кое може да достигне 2,2 милиони барели дневно меѓу април и септември, пазарот тешко ќе го апсорбира вишокот и цените до зимата ќе се движат во ниските шеесет долари. Доколку картелот продолжи да ја шири понудата и во 2026 година, можно е пад на Брент и кон ниво од 50 долари.
Извор: Anadolu
