Продлабочувањето на конфликтот на Блискиот Исток се заканува да предизвика најсериозно нарушување на глобалниот пазар на природен гас од руската инвазија врз Украина во 2022 година, која тогаш ја потресе меѓународната трговија и предизвика рекордни ценовни скокови, објави Блумберг.
Според агенцијата, околу 20% од светскиот извоз на течен природен гас (ЛНГ) минува низ Ормускиот Теснец, клучна поморска рута во Персискиот Залив. Податоците за движење на бродови покажуваат дека испораките низ теснецот речиси се запрени, а најмалку 11 танкери што пловат кон или од Катар ги паузирале патувањата за да го избегнат ризикот.
Катар, вториот најголем извозник на ЛНГ во светот, лани извезе над четири петтини од своето производство во Азија. Најголем купувач е Кина, додека Индија е втор најголем увозник. Аналитичарите оценуваат дека токму азиските пазари се најранливи на евентуални прекини, бидејќи значителен дел од снабдувањето зависи од оваа рута.
И Обединети Арапски Емирати го транспортираат својот ЛНГ преку Ормускиот Теснец. Во меѓувреме, Египет настојува да ги забрза испораките, откако Израел затвори дел од гасните полиња поради безбедносната состојба.
Според експертите, секое натамошно ограничување на пловидбата може да доведе до нагло поскапување на ЛНГ, особено во Азија, но и во Европа, каде складиштата се на пониски нивоа. Дополнителен притисок врз цените создава и растот на нафтата „брент“, бидејќи многу долгорочни договори за ЛНГ се поврзани со цената на суровата нафта.
Турција, која увезува гас од Иран преку гасовод, исто така би можела да се соочи со недостиг доколку испораките се намалат, што би ја принудило да се сврти кон поскап ЛНГ на светскиот пазар.
Доколку конфликтот продолжи и нарушувањата во транспортот опстојат, ризикот од нов ценовен шок на глобалниот пазар на гас значително ќе се зголеми, оценува Блумберг.
Извор: Bloomberg.com
