Стразбур. 17 јуни 2025 – Во пресрет на новите предлози на Европската комисија за ограничување на увозот на руски енергенси, Австрија, Унгарија и Словачка остро реагираат против плановите за целосно прекинување на договорите за гас со Русија, повикувајќи на поголема флексибилност, особено доколку дојде до мир во Украина.
Австрија официјално побара од ЕУ да ја преиспита забраната за увоз на руски фосилни горива ако војната во Украина заврши. Иако земјата дури пред шест месеци престана да купува руски гас, австриската влада предупредува дека предложеното напуштање на руската енергија може да доведе до значително зголемување на цените.
Европската комисија, според најавите, ќе предложи на Европскиот парламент да се забранат краткорочните договори за руски гас во рок од една година, а долгорочните да се укинат до 2028 година. Но, овој план се соочува со силен отпор од трите ЕУ земји без излез на море – Австрија, Унгарија и Словачка. 
Во овој контекст, шефот на унгарската дипломатија Петер Сијарто најави „жестока дебата“, додека словачката влада, чиј премиер Роберт Фицо беше единствениот лидер од ЕУ кој присуствуваше на Денот на победата во Москва, отворено изрази „фундаментално несогласување“ со планот.
Австриската државна секретарка за енергија, Елизабет Цехетнер, изјави дека нејзината земја е загрижена за влијанието што евентуален заеднички европски излез од руската енергија ќе го има врз цените. Таа додаде дека по завршувањето на војната, би требало да се размисли за повторно отворање на пазарите за руски енергенси, и покрај веќе воспоставената правна рамка во ЕУ за нивна елиминација.
Според наводи на „Фајненшл тајмс“, во нацрт-предлогот на Комисијата се предвидува овие три земји да имаат можност да ги продолжат краткорочните договори до 2027 година, како компромис.
Дополнителна загриженост предизвикува и зависноста на ЕУ од руското збогатено ураниумско гориво. Иако постоеше план за наметнување тарифи за увозот на руски облагороден ураниум, Европската комисија го одложи неговото спроведување. Комесарот за енергија, Дан Јоргенсен, објасни дека „нуклеарната енергија е комплексна област“ и дека не смее да се ризикува со безбедноста на снабдување во земјите кои сè уште се потпираат на руското нуклеарно гориво.
Во меѓувреме, руските испораки на течен природен гас (LNG) кон ЕУ и понатаму растат, и покрај постојните санкции, што дополнително ја усложнува енергетската стратегија на Унијата во контекст на воените и геополитичките тензии.
Извор: Euractiv
