Брисел, 13 мај 2025 – Новата австриска влада одлучи да не ја поддржи препораката на Европската комисија за намалување на емисиите на стакленички гасови за 90 отсто до 2040 година, што претставува удар за амбициозната цел на Брисел и дополнителен притисок врз европските институции да ја ревидираат својата климатска политика.
Иако Австрија никогаш официјално не ја потврди поддршката за целта, поранешната министерка за клима Леоноре Гевеслер, членка на Зелените, беше меѓу првите што позитивно реагираа на предлогот на Комисијата уште во февруари 2024 година. Таа потенцираше дека Австрија, независно од европската цел, планира да достигне нето нула емисии до 2040 година.
Сепак, Зелените повеќе не се дел од владата, а новата коалиција составена од конзервативната Народна партија (ÖVP), социјалдемократите (SPÖ) и либералите (NEOS) зазема многу повнимателен став. 
„Клучно е климатската цел за 2040 година да ја зачува конкурентноста на Европа, вклучувајќи ги зелените технологии, но и безбедноста во исхраната и праведната транзиција“, изјавија од австриското Министерство за земјоделство и животна средина за Politico, избегнувајќи директен одговор дали владата ја поддржува 90-процентната цел.
Министерството најави дека ќе го разгледа конкретниот предлог на Комисијата кога ќе биде објавен, нагласувајќи дека „деталите се од суштинско значење за постигнување на целта за 2040 година“.
Одлагањето на поддршката од Виена дополнително ја усложнува ситуацијата за Европската комисија, која веќе го одложи формалното предлагање на законската рамка за целта, поради недостаток на доволна поддршка од земјите-членки.
Комесарот за климатска политика, Вопке Хокстра, сега разгледува „флексибилности“ што би ја задржале формалната цел од 90 отсто, но би овозможиле дел од емисиите да се компензираат преку плаќање на странски држави за нивно намалување, контроверзен пристап преку системот за меѓународни јаглеродни кредити од Парискиот договор.
Германија и Франција веќе ја поддржуваат оваа идеја, но критичарите предупредуваат дека тоа би можело да го наруши интегритетот на климатската политика на ЕУ.
Австриската влада не одговори дали го поддржува користењето на странски јаглеродни кредити, туку само посочи дека „комесарот Хокстра веќе сигнализираше прагматичен пристап“ кон целта за 2040 година.
Иако официјално се залага за климатската неутралност на ЕУ и за веќе усвоените закони, новата влада очигледно го намалува приоритетот на климатските политики. Со доаѓањето на власт, ја укина т.н. „зелена суперминистерка“, која претходно ја обединуваше надлежноста за климата, животната средина, енергијата и транспортот, и ги врати овие области под капата на Министерството за земјоделство.
Дополнително, коалицијата одлучи да го укине иновативниот климатски бонус, кој преку распределба на приходите од јаглеродниот данок ги надоместуваше граѓаните.
Извор: Politico.eu
