Бензините од 27 октомври поевтинуваат за 5 денари за литар, а цената на дизелот останува непроменета на 99 денари за литар, одлучи Регулаторната комисија за енергетика (РКЕ). Екстралесното масло поевтинува за 0,50 денари за литар, додека мазутот поскапува за 0,694 денари за килограм. Со новата одлука, малопродажните цени на нафтените деривати во просек се намалуваат за 1,89% во однос на одлуката од 19 октомври.
Новите максимални цени од 27 октомври во 00:01 часот ќе изнесуваат:
| Нафтен дериват | Нова цена | Промена |
|---|---|---|
| Еуросупер БС-95 | 91,00 ден./л | -5,00 ден. |
| Еуросупер БС-98 | 93,00 ден./л | -5,00 ден. |
| Еуродизел БС | 99,00 ден./л | Без промена |
| Екстра лесно масло ЕЛ-1 | 110,00 ден./л | -0,50 ден. |
| Мазут М-1 НС | 54,273 ден./кг | +0,694 ден. |
Според пресметката на РКЕ, референтните цени на бензините на светскиот пазар се намалени за 8,120%, што овозможува нивно поевтинување на домашниот пазар. Кај дизелот, пак, референтната цена е зголемена за 0,404%, а кај екстралесното масло е намалена за 0,074%. Референтната цена на мазутот бележи раст од 2,060%.
Врз пресметката влијаел и курсот на денарот во однос на американскиот долар, кој е понизок за 0,3292% во споредба со периодот опфатен со претходната пресметка.
Во новата одлука се применети владините мерки со кои ДДВ за ЕУРОДИЗЕЛ е намален на 10%, како и намалената акциза за 4 денари за литар кај бензините ЕУРОСУПЕР БС-95 и БС-98 и кај ЕУРОДИЗЕЛ.
РКЕ нагласува дека утврдените цени се максимални, што значи дека трговците на големо и мало можат да ги продаваат нафтените деривати и по пониски цени.
Новите цени стапуваат во сила на 27 октомври во 00:01 часот.
Извор: РКЕ
