Европската мрежа на оператори на преносни системи за електрична енергија (ENTSO-E) ја повика Европската Унија да го засили финансирањето на електроенергетските мрежи и да обезбеди регулаторна рамка што ќе привлече нови инвестиции, оценувајќи дека модерни и отпорни мрежи се предуслов за пониски сметки за електрична енергија.
Во својата позиција за предлог-регулативата на Европската комисија за идните сметки за електрична енергија, ENTSO-E го поддржува настојувањето за забрзување на електрификацијата преку подостапна и чиста електрична енергија за домаќинствата и компаниите.
„Предлогот на Европската комисија за идните сметки за електрична енергија е важен чекор кон забрзување на електрификацијата преку тоа што чистата и достапна електрична енергија ќе стане подостапна за домаќинствата и компаниите“, изјави претседателот на ENTSO-E, Збинек Болдиш.
Претседателот на Одборот на ENTSO-E, Демијан Кортинас, нагласи дека за оваа цел е неопходно Европа да инвестира во електроенергетските мрежи и да ги зајакне нивните капацитети.
„За оваа амбиција да се претвори во реалност, Европа мора да инвестира во електроенергетските мрежи и да ги зајакне мрежите што ги поврзуваат новото декарбонизирано производство, растечката побарувачка за електрична енергија и иновативните решенија за флексибилност низ континентот. Идните сметки за електрична енергија се едната страна на европската електрифицирана иднина – силните мрежи се другата“, рече Кортинас.
ENTSO-E го поддржува предлогот на Европската комисија, особено принципите за мрежните тарифи, забрзувањето на приклучувањето на мрежата, подобрата размена на податоци, побрзото воведување паметни броила и пофер оданочување на електричната енергија.
Сепак, европските оператори на преносните системи сметаат дека предлогот треба дополнително да се зајакне со поголем фокус врз финансирањето на инвестициите во мрежите и регулаторни решенија што ќе овозможат привлекување капитал и во услови на отежнати пазарни услови.
ENTSO-E предлага пет измени во предлогот. Меѓу нив се обезбедување соодветни услови за инвеститорите преку регулаторните модели за надомест на операторите на преносните системи, поттикнување инвестиции што ќе придонесат за сигурноста на снабдувањето, интеграцијата на пазарите, отпорноста и физичката и сајбер-безбедноста на мрежите.
Организацијата бара и националните регулаторни тела, во соработка со операторите, да имаат поголема улога во утврдувањето на соодветни модели за перформанси, наместо Агенцијата за соработка на енергетските регулатори (ACER) да применува унифицирани споредби на ефикасноста.
Дополнително, ENTSO-E се залага за поголема флексибилност при креирањето мрежни тарифи што ги одразуваат реалните трошоци, како и за доброволна, безбедна и соодветно финансирана рамка за размена на податоци меѓу европските електроенергетски мрежи.
Од ENTSO-E нагласуваат дека пониските сметки за електрична енергија не зависат само од регулативата за сметките, туку и од способноста на европските мрежи да го поддржат растот на електрификацијата, новото производство од обновливи извори и зголемената побарувачка.
„Електрифицираната иднина на Европа нема да се изгради само врз пониски сметки за електрична енергија. Таа ќе се изгради врз силни мрежи што овозможуваат таквите пониски сметки да станат реалност“, наведува ENTSO-E.
Извор: Entsoe.eu
