Европските рафинерии одиграа клучна улога во спречувањето на сериозен недостиг на авионско гориво во пресрет на летната туристичка сезона, откако воените случувања на Блискиот Исток ги нарушија традиционалните извозни рути од Персискиот Залив, пишува Financial Times.
Според весникот, по американско-израелските напади врз Иран и прекинот на дел од извозните канали, европскиот пазар се соочил со ризик да остане без значителни количини керозин токму во периодот кога авиосообраќајот бележи најголем раст. Вообичаено, околу една четвртина од потребите на Европа за авионско гориво во текот на летото се покриваат од Блискиот Исток.
Рафинериите низ Европа, меѓу кои и постројката на BP во шпанскиот град Кастељон, реагирале брзо и ги пренасочиле производствените капацитети кон максимално производство на авионско гориво. Директорот на рафинеријата, Пако Кинтана, за Financial Times изјавил дека уште во првите денови од кризата било јасно дека европските производители ќе мора да ја пополнат празнината на пазарот.
„Сфативме дека товарот ќе падне врз нас и дека ќе мораме да преминеме на максимално производство на авионско гориво“, вели Кинтана.
Како резултат на ваквите мерки, производството на авионско гориво во Европа во март достигнало рекордни 1,3 милиони барели дневно, што претставува раст од 22% во споредба со истиот период лани, покажуваат податоците на Меѓународната агенција за енергија.
Со зголеменото домашно производство, Европа успеала да ја преполови потребата од увоз на гориво од други региони, иако и натаму значително се потпира на испораките од САД.
Експертите оценуваат дека европските рафинерии успеале да го постигнат тоа и покрај намалените капацитети, кои со години се под притисок поради затворање на постројки и недоволни инвестиции. Денес во Европа функционираат нешто повеќе од 70 рафинерии, во споредба со над 130 во САД и околу 300 во Азија.
Во шпанската рафинерија во Кастељон, инженерските тимови за само неколку недели извршиле серија технички прилагодувања, менувајќи температури, притисоци, катализатори и видови сурова нафта за да го зголемат приносот на керозин. Благодарение на тие промени, производството на авионско гориво било зголемено за околу 30%.
Аналитичарите оценуваат дека станува збор за исклучително достигнување. Јуџин Линдел од консултантската компанија FGE NexantECA го опишува потегот како „херкуловски подвиг“, нагласувајќи дека шпанската рафинерија успеала да го зголеми производството значително повеќе од многу американски конкуренти.
Иако во првите недели од кризата се појавија предупредувања дека Европа би можела да остане без авионско гориво за неколку недели, таквите сценарија не се остварија. Напротив, притисокот врз снабдувањето постепено се намалува, а пазарот повторно се стабилизира.
Сепак, во индустријата предупредуваат дека неизвесноста не е целосно надмината. Рафинериите продолжуваат да работат со засилен интензитет, а производителите остануваат внимателни поради можноста за нови нарушувања на глобалните енергетски текови.
Според Financial Times, актуелната криза уште еднаш покажала дека европската рафинериска индустрија, и покрај ограничените капацитети, останува стратешки важен фактор за енергетската и транспортната безбедност на континентот.
Извор: Financial Times
