Париз. 9 јули 2025 – Европа е на добар пат да обезбеди енергетска независност од Русија до 2028 година, изјави извршниот директор на TotalEnergies, Патрик Пујане. Според него, новите извозни капацитети за течен природен гас (LNG) што се развиваат во САД и Катар ќе бидат доволни за да ја задоволат побарувачката на Стариот континент.
„Благодарение на новите капацитети што се во изградба во САД и Катар, Европа ќе може да ја обезбеди својата енергетска сигурност без руски LNG во 2028 година“, рече Пујане за BFM Business.
Изјавата се совпаѓа со континуираните напори на Европската унија да стави крај на енергетските врски со Москва, како одговор на воената агресија врз Украина. И покрај значително намаленото влијание, Русија сè уште обезбедува речиси 20% од гасот што го користи Европа. 
TotalEnergies, една од водечките светски енергетски компании, моментално снабдува LNG за Европа од САД и Русија.
Пујане, исто така, понуди охрабрувачка проценка за краткорочните цени на горивата, истакнувајќи дека на пазарот има доволно понуда и дека Саудиска Арабија активно делува за да спречи ценовни шокови.
Сепак, тој предупреди на зголемените геополитички тензии и истакна дека трговските конфликти создаваат „несигурности кои не се добри за економскиот раст“.
Извор: Energyconnects.com
