Македонија во 2024 година постигна историски успех со 55,72% учество на обновливите извори во енергетскиот капацитет, предводени од соларните електрани.
Скопје. 02 Мај 2025 – Регулаторната комисија за енергетика (РКЕ) го објави годишниот извештај за 2024 година, кој нуди детална слика за енергетскиот сектор во Македонија. Во извештајот се истакнува дека за прв пат во нашата држава, обновливите извори на енергија сочинуваат 55,72% од вкупниот инсталиран капацитет на електроцентралите, а производството на енергија од фотонапонските електрани го надминува производстворо на хидроцентралите.
Според извештајот на РКЕ, фотонапонските електрани достигнаа удел од 28,40%, надминувајќи ги хидроцентралите со 24,13%. Вкупниот инсталиран капацитет порасна за 13,35% на 2.983,9 MW, а соларната енергија забележа раст од неверојатни 186%. Иако вкупното производство на електрична енергија падна за 6,47% (6.129 GWh) поради неповолни хидролошки и метеоролошки услови, домашното производство обезбеди 88,97% од потрошувачката, намалувајќи го увозот на само 11,03%.
Извештајот бележи и раст на граѓанскиот ангажман – 1.598 субјекти, вклучително 813 домаќинства, се приклучени како производители, предавајќи 12,3 GWh во мрежата, што е за 90% повеќе од 2023 година. 
Слободниот пазар на електрична енергија покрива 49,84% од потрошувачката, со 21 активен снабдувач и пад на цените за големите потрошувачи од 8,56%.
Во секторот на нафтените деривати, увозот (1.313.693 тони) и продажбата (964.886 тони) се намалени за 2,65% и 4,21%, со дизелот како доминантен (73,95%). РКЕ донесе 76 одлуки за стабилизација на малопродажните цени, ублажувајќи ги притисоците од глобалните берзи.
Секторот на природен гас забележа значителен напредок со сертификацијата на државниот оператор НОМАГАС, кој пренел енергија еквивалентна на 3,74 милијарди kWh. Цените се преполовени (45–80 EUR/MWh), а 85% од гасот се користи во топлани и комбинирани постројки. Сепак, дистрибуцијата до домаќинствата останува ограничена на 2%.
Во топлинската енергија, ЕНЕРЏИ ЕКОЛИНК АД стана нов снабдувач, намалувајќи ги цените за 17%, иако ефективниот пад е 3% поради укинувањето на субвенциите во август 2024 година.
Годишниот извештај на РКЕ за 2024 година ја потврдува определбата на Македонија за енергетска транзиција. Со доминација на обновливите извори, зголемена граѓанска вклученост и стабилизација на цените, земјата е на добар пат да ја зајакне енергетската независност. РКЕ најавува понатамошни инвестиции во соларни капацитети и модернизација на мрежата, со цел да се задржи овој позитивен тренд.
Извор: Регулаторна комисија за енергетика, водни услуги и за управување со комунален отпад
