Брисел. 28 април – Германија треба да размисли за поделба на својата електроенергетска мрежа на до пет ценовни зони за подобро одразување на регионалните трошоци за струја, препорачува Европската асоцијација на оператори на преносни системи (ENTSO-E) во најновиот извештај објавен денеска.
Германија во моментов функционира како единствено пазарно подрачје со унифицирана цена на големо, иако недостатокот на капацитет за пренос од ветровитото северно подрачје кон индустрискиот југ сè повеќе создава мрежни тесни грла и ја засилува потребата од реорганизација.
ENTSO-E анализираше различни сценарија за поделба на пазарот на Германија и Луксембург, при што најголеми економски придобивки – околу 339 милиони евра до 2025 година – би се постигнале со поделба на пет зони. 
Иако ваквата реформа би можела да доведе до пониски цени во северните делови богати со обновливи извори, во јужниот индустриски регион цените би можеле да пораснат.
Проблемот доби меѓународна димензија откако Шведска, која веќе ја има поделено својата мрежа на четири зони, минатата година најави дека нема да одобри нов енергетски кабел кон Германија доколку Берлин не ја реорганизира својата мрежа.
Европската Унија им дава на земјите членки шест месеци за да донесат одлука врз основа на заклучоците од извештајот. Доколку не постигнат согласност, Европската комисија може да предложи промени во системот на пазарни зони.
Сепак, германската влада, заедно со главните преносни оператори 50Hertz, Amprion, TenneT и TransnetBW, изразија спротивставување на оваа идеја. Тие сметаат дека предложените придобивки се минимални во споредба со вкупните системски трошоци и предупредија дека поделбата би ја намалила ликвидноста на пазарот и би ги зголемила трошоците.
Операторите исто така ја критикуваа студијата, тврдејќи дека е заснована на застарени податоци и не ги зема предвид идните развојни проекти како што се новите далекуводи и проширувањето на обновливите извори на енергија.
Извор: Ројтерс
