Лондон. 7 јули 2025 – Хидроенергијата останува клучен двигател на глобалната енергетска транзиција, покажува најновиот извештај World Hydropower Outlook 2025 на Меѓународната асоцијација за хидроенергија (IHA). Во 2024 година, светот доби 24,6 GW нов хидроенергетски капацитет, со значаен напредок кај пумпните складишта (PSH), кои сè повеќе се наметнуваат како суштинска алатка за балансирање на електроенергетските системи.
Во услови на сè поголема интеграција на променливи извори како ветерот и сонцето, пумпните хидроелектрани се враќаат во фокусот. Во 2024 година беа инсталирани 8,4 GW PSH, што претставува годишен пораст од 5% и доведе до вкупен глобален капацитет од 189 GW. Само за две години, темпото на изградба на вакви системи е речиси удвоено.
Конвенционалната хидроенергија, иако малку под петгодишниот просек, и натаму напредува – со 16,2 GW додадени во 2024 година, најмногу во Источна и Јужна Азија, како и во Африка. 
Производството на хидроелектрична енергија во 2024 година порасна за речиси 10%, достигнувајќи 4.578 TWh – и покрај екстремните суши кои ги погодија Латинска Америка и јужна Африка. Тоа ја потврдува отпорноста на хидросекторот, но истовремено укажува на потребата за климатска адаптација.
Според IHA, Кина останува глобален лидер со 14,4 GW нов капацитет, вклучувајќи 7,75 GW PSH, и со над 91 GW во изградба веќе е на добар пат да ја надмине целта од 120 GW пумпно складирање до 2030 година.
Во Европа, хидропроизводството достигна рекордни 680 TWh, а зголемената потреба за флексибилност доведе до раст на проектниот портфолио: 52,9 GW PSH проекти се во развој, од кои 3 GW се веќе во изградба.
Во Африка, годишниот капацитет е удвоен во однос на 2023 година, со повеќе од 4,1 GW нови проекти. Регионалниот потенцијал сè уште е далеку од искористен – од над 600 GW, само мал дел се активирани. Меѓу клучните проекти се пуштањето во работа на Јулиус Њерере браната во Танзанија, новите агрегати на Големата етиопска ренесансна брана, и целосната комисионираност на Карума (Уганда) и Нахтигал (Камерун).
Извештајот открива дека глобалниот хидроенергетски „pipeline“ сега изнесува околу 1.075 GW, вклучувајќи 600 GW PSH и 475 GW конвенционален хидро капацитет. Ова е тројно зголемување на пумпаното складирање во развој во споредба со 2023 година, што ја потврдува промената во глобалниот енергетски фокус.
IHA истакнува дека хидроенергијата мора да се развива одговорно и транспарентно, со почитување на локалните заедници и екосистемите. Сè поголем број проекти добиваат златна и сребрена сертификација според Хидроенергетскиот стандард за одржливост, вклучително и 198MW Mascarenhas (Бразил) и 2,45GW Ituango (Колумбија).
Извор: Hydropower.org
