Брисел. 08 Mај 2025 – Во втората половина на 2024 година, цените на природниот гас за домаќинствата во Европската унија забележаа пораст за првпат откако се стабилизираа по енергетската криза во 2022 година. Просечната цена, вклучително со даноци, достигна 12,33 евра за 100 киловат-часови, во споредба со 11,04 евра во првата половина од годината. Ова е највисока забележана цена откако започна собирањето на податоци во 2008 година.
Главна причина за поскапувањето се зголемените даноци во повеќе земји членки на ЕУ, откако владите ги укинаа или намалија мерките за ублажување на ценовниот удар воведени по кризата.
Податоците откриваат значителни разлики во цените на гасот за домаќинства низ ЕУ. Највисоки цени се регистрирани во Шведска (18,93 €/100 кWh), потоа во Холандија (16,71 €) и Италија (15,86 €). Од друга страна, најниски цени имаа Унгарија (3,20 €), Хрватска (4,60 €) и Романија (5,40 €). 
Гледано во однос на куповната моќ на населението, ситуацијата останува слична. Највисоки „реални“ цени имаа Португалија (16,60 PPS), Италија (16,49 PPS) и Шведска (16,08 PPS), додека најповолни беа Унгарија (4,72 PPS), Луксембург (5,57 PPS) и Хрватска (6,67 PPS).
Во споредба со втората половина на 2023 година, шест земји членки пријавиле пораст на цените за домаќинствата, главно како резултат на зголемени даночни оптоварувања. Наспроти тоа, 14 земји забележале намалување на цените, благодарение на пониските трошоци за енергија и снабдување.
Во делот на потрошувачите што не се домаќинства, претежно индустријата и деловниот сектор, падот на цените што траеше повеќе од една година сега запре. Во втората половина на 2024 година, просечната цена без ДДВ благо се зголеми од 6,16 на 6,24 евра за 100 кWh, додека цената без никакви даноци порасна од 5,30 на 5,41 евра.
И покрај ова мало зголемување, податоците покажуваат дека дури 21 земја членка забележала намалување на цените за секторот кој не се однесува на домаќинствата на годишно ниво, што главно се должи на намалени трошоци за енергија и дистрибуција. Само две земји пријавиле годишен раст на цените во овој сегмент.
Извор: Евростат
